logo mix

Rab Danas

Nezavisni internetski portal otoka Raba

  • Imperial Rab
Petak, 12 Listopad 2018 18:22

Rapski kantunić Josa Fafanđela: ĆAKULA O GALEBU I LIPOTI

Autor:
Ocijeni sadržaj
(1 glas)
Rapski kantunić Josa Fafanđela: ĆAKULA O GALEBU I LIPOTI Foto: Hrvoje Keko

Va jednomu lipomu danu i ovo san, ma odavna već, zapisal: "...Ne, ne - ni većega gušta nego rano z jutra na more poć. Tiho je i bonaca kako da mora ni, a sunce se jušto pomalo diže zgor Velebita. Obala zelena, žal miruje, a more je ne samo mirno nego i bistro kako suza. Dno se vidi, ježići se leno miču, travina se na stenju lenasto lela, a ona lipa i šara žotrica na prešu uteče od jedne va drugu bužu. Jedino ona mala bajica ima kuraja pa će se z vamin dobre volje i malo poigrat. Črška više ni, pa se i tići bolje čuju va gušću, a gori visoko lastavice igraju kolo, dozivaju se i šapuću - bit će da se i one pomalo za partencu svoju parićivaju. A galebi! Ma kako galeba ne spomenut! Oni se svakuder prezentaju. Zgora letu i ki put zakriču, a doli na moru mirno plavaju na bonaci, oli se za kon retkon ribicon zaletu. Ma kako je lipo tu sliku gledat i unako je z gušton i doživit..."

 

I sada, pun te lipote i veloga gušta, sedin ja potle toga z dva penzijonera Dalmatinca, Krston (ki je odunda nažalost već pokojni) i Antom. A oba su rapski zeti. Uživali su leto na Rabu, a svakoga popodnedva bili su va kaiću (svaki va svomu) i samo su ribu lovili.

 

Seden ja kod njih priz kuću, uz bićirin rakije i, kako ča san rekal, još unako pun gušta, povidan in kakovo san lipo jutro doživil, kako mi je bonaca dušu ličila, lastavice i tići pivali i kako su galebi letili, kričali su, oli su se leno na bonaci lelali. Lipi sivi i beli galebi! Čudo jedno!, govorin ja njiman. Nisan još sve ni povidal, a već šervivan kako me Krsto bledo gleda i grišpa čelo. Pa dočim san finil, un će nato:

- Ajs kvragu ti i galebi! Ja san jučer lovija ribu va kanalu, a galeb mi je sija na kaić pa mi se na provi grubo posra! Odnija ga vrag dabogda!

A njigov kumpanj Ante, vreda se je na to počal smijat, pa se je rastrubil:

- E bravo, baš ka da je mene pita! Škrt si ka đaval, pa nebi dal galebu ni ribicu za izist! E da san ja galeb,... ja bi ti za dišpet cili kaić posra!

 

I dabome, svi ki su to okolo slušali smijali su se, a ja još više od njih, kada san vidil kako je moja poezija o lipomu danu na kanati završila. Oću reć, kako je mali korak od lipote rajske bonace, do posranoga galeba. I još je grlati Ante na kraju nadodal:

- Ajs kvragu ti i tvoja lipota! A znaš ti ča je lipota? Lipota je doć u Split i gledat Ajduka na Poljudu. To je lipota!...

 

Rab, 12.10.2018.

Pročitano 1602 puta
Josip Fafanđel

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia

 

Popularno

Novi oglasi

Gliser Elan
( / Auto, moto, nautika)

Gliser Elan

Ford Cmax 2016.g.
( / Auto, moto, nautika)

Ford Cmax 2016.g.

Održavanje nekretnina
( / Nekretnine, zemljišta i prostori)

Održavanje nekretnina

Posljednje teme s tužibabe

U nastavku dostavljam slijed dopisa koje sam slao komunalnom redaru, gradonačeln...
Prije 1 godinu 0 16362
Imate neki problem koji treba netko riješiti... Ne znate tko je nadležan za rješ...
Prije 3 godina 0 24449

Novo u imeniku

Web Arba

Obrt Web Arba od 2005. posluje na otoku. Bavi se servisom računala i računalne opreme, izradom…

Sea Kayak Croatia

Mala tvrtka za velike doživljaje na Jadranu!