Home Beseda po domaću Rapski kantunić Josa Fafanđela: TOVARJA VRIMENA

Rapski kantunić Josa Fafanđela: TOVARJA VRIMENA

0
Rapski kantunić Josa Fafanđela: TOVARJA VRIMENA

Foto: RabDanas

 

Tobože, pomalo, ma isto da gre. A svi drugi jopet samo njurgaju i jadaju se. I to ne samo ljudi ki sve težje živu, nego i oni ki o tomu više znaju nego mi.

Rab danas oglas

 

Evo, dodar su se ovih dan i naši privrednici jadali, da stanje ni kako triba, da je i njiman sve težje i da smo po puno toga na dnu od drugih držav, oli smo samo za jednu oli dvi skaline gorije. Svi da nas redon pasivaju, pa unda ni meni ni ćaro ča se to dogaja. I još se moglo čut da je na birojiman kolo sto četrdeset hiljad nezaposlenih, a poduzeća da išću trejset hiljad radnikov i da ih ne moru nać. Ni ćaro ki je tudi lud, a ki pametan. A i broj službenikov da samo raste. A kada ča tribaš po kancelarijah nikakor do toga doć, nego trpi i čekaj.

 

I unda mi prijtelj povida jedan sulac ki se jušto najbolje na sve to nadodiva. Govori un meni, kako su lisica, vuk i tovar, šli na općinu iskat dozvolu za otvorit niki posal. I najprvo da gre lisica, boj da je ona tobože mudra i pametna i ona će dozvolu za tren dobit. Ma je vreda arivala nazad od kancelarije, boj da su je na svi modi zimučili, a od dozvole niš.

– Čekaj malo, da nato govori vuk, ja san oštar i opasan, mene će ju poslušat i baren od straha će mi dat tu vražju dozvolu. Ali potle pol ure evo i njega van, zmučenoga, ali od dozvole niš.

– Ma njanci ne hodi nutra, da govori un tovaru. A tovar se neda, nego unako trdoglav, ali i pametan, da gre i un nutra. I ni pasalo ni pet minuti, evo njega van, smije se i maše z dozvolon va rukamin. Ma naki mod su to oni tebi dali, a namin ne, čudu se oni?!

– A lipo, prijtelji moji, govori njiman tovar, gren ja nutra, a nutri svi redon od moga roda. Sve samo tovar do tovara

 

  • Joso Fafanđel – Rab, 23.11.2018.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime