logo mix

Rab Danas

Nezavisni internetski portal otoka Raba

Četvrtak, 03 Listopad 2019 10:36

Rapski kantunić Josa Fafanđela: MALA MATURA

Napisao/la Josip Fafanđel
Ocijeni sadržaj
(1 glas)
Rapski kantunić Josa Fafanđela: MALA MATURA Foto: Goran Novotny

Evo nas, to smo mi, ili bolje reć to je del od onoga ča je ostalo od VIIIa i VIIIb razreda od genracije 1961.-1962. godine. I neka znate da se svake godine sastajemo, makar nas je sve manje, nažalost.

 

 

Znamo da nismo više dica, ona od prije 58 godin, ali tu smo i nismo još za hitit ća. Godine ne moremo fermat, ali nemojmo na njih previše ni mislit. Ča je - tu je, a ča će bit - bit će!

I zato smo sve obrnuli na šalu, na sulac, na anegdote iz živoita.

 

Evo ovako, susretnem neki dan Borisa Dumičića, pa mi se žali da je bil na ribi, ali da ni latil ni jednoga jedinoga kanja. 

- Ma kako to? - ptian ga ja. 

- A lipo - govori un meni, boj je naš prijatelj Pićo (Macolić) jedan veli viškun. Kuntramo se niki dan na ulici, a ja san pogrišil, pa mu govorin da mi se preši, boj da gren na ribu. Ma da je baren un mučal! Ne, nego mi naglas govori: "A hodi, hodi pa puno ribe ćapaj!" I tako me je začaral pa nisan latil niš.

A ja mu nato govorin: Eto vidiš Boris, a ti duron govoriš da ti je Bepa (Richter) kriva, boj da ona tvoji kanji lovi. A sada vidiš da ni kriva Bepa, nego je Pićo kriv!

 

A ona druga gre uvako, sedimo Boris, Pićo i ja na taraci, kad gre po ulici naš kolega Vinko Buzdrin. Zovemo ga s namin za stol, a un je potegal katridu pa se je jedva na nju kalal. A Pićo to gleda pa mu govori: - Ćo, ma ti si jako grubo ostaril! A Vinko nato govori: - A kako neću ostarit kada su se sve bolešćine za mene ćapale!

I unda nan povida kako mu je onaj dr. Tomulić va Riki već prvije stavil ne jednoga nego tri stenta.

- Kad prije nikoga vrimena boli mene opet va prsiman i opet su me potirali kod Tomulića. I ovoga puta mi je stavil još jedan - četrti stent, pa mi govori: "E moj Vinko, to van je to, četrtoga san vam stavil, a za petoga više mesta ni!"

- Ma doktore, govori Vinko njemu, a ča ako mene bude opet bolilo? Kadi ću ja unda poć i koga ću ja zvat?

A doktor da mu nato govori: - Ako vas opet zaboli, unda ovoga puta ne zovite mene, nego zovite - Panta!

 

E zato smo na kanati lipo zaključili uvako, da neka naša Bepa i naprvo lovi kanji na Borisovoj pošti, a sviman namin neka ostane još ča više vrimena do onoga Vinkovoga petoga stenta! Dabome, i da ćemo se do godine opet na vičeri kuntrat, a Panta - zasvin debandat.

 

Joso Fafanđel za Kanturnić, 1.10.2019.

Pročitano 2249 puta

seakayakcroatia