logo mix

Rab Danas

Nezavisni internetski portal otoka Raba

Petak, 17 Siječanj 2020 16:59

Rapski kantunić Josa Fafanđela: GODINA OD PASI

Napisao/la Josip Fafanđel
Ocijeni sadržaj
(2 glasa/-ova)

Blavdani su pasali, izbori su pasali i ja razumin da smo se zotin malo i spuhali i zimorili. To pari da je arivalo vrime kada bi se sada valjalo malo i latit kakovoga posla. Oli ćemo još i maškari čekat pa ćemo unda! A neka, i to je lipo. Jedino da va svemu i malo miru ne prepasamo.

 

Jušto san prije jedno par godin i jednu pismicu žvental ku san nazval - Bolanča, stodira i decimalj. Pa san va toj pismici rekal recimo i ovo: ...Da je svako vrime imilo svoje vage / svoju bolanču, stodiru i decimalj. / Ma ne one za vagat žito, voće, drva, oli ribu / Ne, nego bolanču za mirit dobrotu, / stodiru za dušu zvagat / oli onaj veli decimalj / za mirit zlo, muku i gruboću... 

 Unda san rekal kako smo sve te starinske vage danas zagubili, oli smo ih po konobah zabaratali i na njih zaburavili. I neka, boj danas imamo nove i mudernije vage, a i one će nan bit na potribu, ma ne samo da će nan bit, nego već i jesu. Jopet za vagat sva ova zla kolo nas, boj i lipe i grube stvari moraju imit svoju miru. 

 

Otil san zato reć ku besedu o oniman pasaniman izboriman, i zausput ča to svitovat našemu novomu presjedniku države. Ali bit će prlike kad se un lati toga posla. Za sada bi i njemu jedino priporučil, kako bi i un bogal kupit jednu šesnu vagicu za mirit (i to na vrime) sve ono va čemu pravu miru ne bi smil nikad prepasat.

 

 

 

Da, jušto kako ča san i rekal - sve smo to prepasali i nova godina pomalo kuri. Naša nova godina. Govorin to zato boj san nideri priočital naki mod su recimo Kinezi krstili svoju novu godinu. Kod njih da će ova godina bit godina štakora, a to pari godina od miši. E, ali zato da će ona nosit sobon mir, sriću, zdravlje i napridak. Eto, to san pročital, ali san i zapametil. A ki nebi i zapametil tako lipe stvari kako ča su: mir, srića, zdravlje i svako dobro. Pametni su ti Kinezi, boj oni to tako odredu, a unda se toga kroz godinu i držu. Dabome, i mi smo na svoj mod jedni drugiman poželili i sriću i zdravlje i svako dobro, ali nisan šerval da smo to nideri zapečatili, pa da to bude i naš ho-ruk za naprvo. 

 

Varamente, ovo ča san čital va novinah, to da se je dogajalo niki dan va Opatiji, kadi je arivalo jušto puno gosti od Kine. Ma ni tako važno ni kadi se je to dogajalo, ali je bilo kuražno pročitat va naslovu, kako je tobože, ta kineska nova godina partila naprvo od Opatije, a da će bit i po celoj Hrvaškoj državi. Ben, ma kuliko ja pametin, mi našiman mišiman darujemo samo svake sorte otrovi, na svaki mod ihmogli zavolit, recimo maške. Pa neka naša godina bude godina od mačak. A jok, ma ni to ni dobro, boj kineziman nebi bilo drago da naše maške lovu njihovi miši. E, pa neka unda kod nas bude godina od pasi. Oštija, to bi nan jušto odgovaralo, boj mi i unako volimo manje laurat, a puno više - na vas glas samo lajat.

 

Joso Fafanđel za Kantunić, 17.01.2020.

Pročitano 2016 puta

seakayakcroatia