Foto: RabDanas
Oću reć, uz malo strahovanja, valja nać mesta i za malo se poveselit. Za sulacat se, dabome. Ma ne za rugat se. Govorin to zato boj san niki dan va jednoj veloj butigi kuntral jednu žensku. Ona se vozi po skalamin doli, a ja ozdola na gori. I dočim me je šervala zatrubi ona, ma jako, naglas, već od vrh skal:
– Aha, evo našega porugavnjaka!
Imila je i ona trubicu priko ust pa je nisan mogal poznat ni kad je uzame pasala. A gruba je to brate beseda – porugavnjak. Nebi ja to otil ni bit. Da se sulacan i hitin ki put na štrambo, to da, ali da se na grubi mod rugan drugiman, oštija ma to nebi moglo bit istina.
Evo, za jedan primjer, i sada ću jednu stvar malo hitit na štrambo.
Otil san reć ku besedu o našemu trizmu na Rabu. Ma nebi to bile vele študije o turizmu, nego ono par besed o našima gostiman. Istešo, ove godine i je važnije brojit gosti nego do sada, boj je puno toga zabrenzala ova vražja korona. Ben, ma evo, potrehilo se da neću brojit gosti, a ni čint študije o turizmu, nego me tiraju da moran ku besedu reć, ne o turizmu nego o – antiturizmu. Da, i to virovali oli ne, o antiturzmu na Rabu. Ma ki je vrag dal napamet onomu čoviku va Brbatu da ovih dan, ne s kolcen, nego z velon lopaton tira gosti, tobože od svoje plaže i od svoga mora? A i država, i ovi naši na Rabu, celo vrime se movu da z lipon propagandon dopeljaju ča više gosti na Rab, a unda se najde jedan mudrac, pa misto domaće rakijice i dvi suhe smokve, nudi gostu lopatu priko hila.
Sve bi to država tribala stavit na red, boj i ja san do sada već na više mesti šerval, kako ljudi (a najviše vikendaši) stavljaju na plaže tabelice na kiman piše – PRIVAT! Tobože, daju do znanja sviman namin da se moramo dricivat odotli ća, boj da je to njihovo. Unda meni više puti dojde hotada da se tornan nazad i sve te tabelice pokupin i pohitan va vriću, pa unda šnjiman doma na oganj. Rab od turizma žive i sviman bi moralo bit ćaro da se takove grube stvari ne bi smile dogajat. Pugotovo mi ni ćaro da se to danas dogaja i va Brbatu. Ala da su i oni pošempijali! Oštija, a vajk se je na Rabu govorilo da su Brbaćani najpametniji od svih nas i da se oni rađaju z malon maturon. Ala da je to bilo samo ono jedan put, boj po novomu pari mi se da se i oni sve manje držu mature, a da sve više volu z lopatamin mahat.
Eto, pa neka mi ona ženska jopet reče da se ja rugan. Makar je to i lipo da se mi Rabljani z grubiman stvarima volimo rugat. Čuli smo, ove godine je i Fjera jako siromašna, ma isto, pitan ja jednoga ako će poć grad malo zaviriti ča se dogaja? A un mi govori: Ćo, a ča ni bolje poć i grad nego va Brbat – kadi moreš lako falsovat i lopatu priko hila
Joso Fafanđel za Kantunić, 26.07.2020.
