logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Petak, 12 Veljača 2016 13:53

Maškri bez maškar

Napisao/la
Ocijeni sadržaj
(4 glasa/-ova)

Celu celcatu šetemanu gnjavili su nas jugo, daž i oblačine svake sorte. A zamislite, sunce se je naviše pokazalo jušto na dan od mesopusta, kako da je otilo reć: evo ljudi, molat ću vas da se veselite i uživate va zadnjemu delu od maškar. I bilo je tako samo za vrime duranja onoga suđenja našemu Juru Piškancu, va Varošu, a potle toga opet jako jugo, pa po noći i daž. Ali zaman je nas vrime pustilo da se malo zimašemo na dan mesopusta kada smo mi Rabljani, pari mi se, zasvin va zadnje vrime i maškari zapustili. Oni stariji više zato ne maru, a oni mlaji su se tuliko zlenili da ih nideri više ni njanci za vit. I tako su kod na na Rabu pasali maškri bez maškar. A dodar ni naš Imperijal ni bil vridan baren par šak čevapčiči hitit na ploču. I tako se je dogodilo, da mužika sviri, a tanci ni. Ne pačan se, ma niki vrag se na grubi mod dogaja. Debandali smo maškaranje, pa se sve bojin da gre pomalo vrime kad će nas drugi na svoj mod maškarat. A ni mi baš jako drago kada me drugi oćeju na silu maškarat, oli - od mene vizeru učint.

Svi smo mi jedan veli Jure Piškanac

Ala šu, ima i onih ki ćeju reć kako je to šordrija, ali ni. Varate se ljudi. Suđenje Juru Piškancu prlika je sviman namin da se malo stavi na cidilo sve ono kolo čega cele godine duron njurgamo i njurgarimo. Rugamo se tobože, tomu nesritnomu Juru Piškancu, ki je kriv za sve zlo, i svaku porkariju ča se kod nas dogaja. Na kanati ga i osudimo za tu krivicu i zgorimo na ognju, makar znamo, da sve zlo šnjin neće zgorit nego će i dalje ostat i rivat se med namin i naprvo, a mi ćemo baren na dan mesopusta znat da smo zapravo svi mi zajedno jedan veli Jure Piškanac. Niki više, niki manje, ali nas se ne more zgorit, nego kroz sulac moramo sami sebe, a i naše vlasti, natirat da već potle dana od mesopusta, znemu ća sve maškarete oli maske, i pokažu, oni pravi - čisti, oli šporki obrazi. 

Ni kriv ni dužan...

I kakovi su nan unda bili maškari na Rabu? Tanki, jako tanki. A ono malo mladih ča se je maškaralo još se je i va jednu tuču zamišalo. Jušto san malo bil pofalil Mundnici za oni njihovi mašakarani tanci po subotah, a i tribalo ih je pofalit boj su bili jedini ki su kakovi-takovi tanci parićali. Ali svi su mučali da su se tamo zadnje nedilje mladići kaubojski i potukli. A naki mod san ja to doznal? Kuntrivan pasane subote jednoga Loparanina i vreda san šerval da mu je nos vas rastučen.

- Bože moj, ma ča ti se to dogodilo?, pitan ja njega.

- Hm, da ča?, govori un meni, ovo san zaradil Mundanijah na maškariman.

- Ma ča je bilo, s kin si se to vragon potukal?, pitan ja njega.

- Z nikin, govori un meni, nego san stal zbande, kad najednaput su se ugasila svitla, počala je tuča, a ja san se stisal uza zid. Ma zaman, govori un, boj vreda me je niki prasnul po nosu i vas san ostal va jednoj veloj krvi.

- A ki te je to prasnul?, pitan ja njega.

- A ki? Vrag pakleni, ki će to znat va onomu škuromu. Ni kriv ni dužan, dobil san priko nosa, nit znan je bila šaka, oli komad zbice.

Bravo, mislin se ja, naši mladi misto da se se maškaraju, tancaju, veselu i badaju divojke, oni se lovu barufe. Naloču se, kako pizdine, da prostite, pa se medase tuku. I ne samo medase, nego svi redon pasivaju grube bariškade. A kad triba doć tancat Grad va Varoš, uz onu živu njihovu mužiku, unda nidiri nikoga ni. Dabome, a koga će ju vraga po danu tancat kad je svitlo i ne moru nikomu šaku zacipat.

I ča reć potle svega? Korizma je i valja se držat one zadnje oporuke od našega Jura Piškanca, va koj na poručuje: Sve moje molitve ostavljam svima Rabljanima - da va Bog pamet prosvitli!

Vaš Kumpar Bepo – Josip Fafanđel

Pročitano 2089 puta

Ova e-mail adresa je zaštićena od spambota. Potrebno je omogućiti JavaScript da je vidite.

seakayakcroatia