Home Beseda po domaću Rapski kantunić Josa Fafanđela: ZAHLADILO JE

Rapski kantunić Josa Fafanđela: ZAHLADILO JE

0
Rapski kantunić Josa Fafanđela: ZAHLADILO JE

Foto: Foto: I. Hodak

 

Z jedne bande vrućina i posal, a z druge i kune i euri ki su letili va naši takujini. Posal i muka, ali svi su mirni i svi muču. Študijan o tomu, a unda san se domislil kako san jedanput zapisal, da bi namin Rabljaniman leto tribalo durat ne dva-tri miseca, nego šećto celu celcatu godinu. Ako me pitate, da zač? – unda ću van reć da zato boj bi unda kod nas sve teklo na lipi mod, kako po loju, kako se ono reče. Niki se nebi ljutil, niki karal, niki nebi tekal po sudiman drugoga tuževat, oli pravdu iskat. Da, boj od posla ne bimo imili vrimena.

Rab danas oglas

Namin Rabljaniman bi leto tribalo durat celu godinu, da ljudi budu vajk dobre volje, da budu kuntenti, oću reć da i šoldi kaplju celu godinu, a ne samo dva-tri miseca pa ki ga ćapa-ćapa. I niki nebi mislil na vraga, nego na posal, a bilo bi manje vrimena i za sudi i abukati

 

Ako bi bilo i karanja unda bi se to najviše dogajalo znutra, tobože po famejamin, va kući. Više puti i najviše med rodbinon i braćon. A krivi su oni vražji deli, kada se fameje začmu dilit potle smrti oca i matere. Do unda sve med i mliko. Ljudi se posećuju, kuhaju se kave i nudu rakijice, a ki put i malo pršuta nariže. Ma, kada stari, nažalost, partu na onaj drugi svit, e unda interesi načmu minjat karakteri i gotovo je – više nima braće. Rakijice se nudu sve manje, a pršuta kako da više i ni za kupit.

 

E, a jušto mi niki dan jedan čovik govori, tobože žali mi se, kako je njemu jedan njigov stariji sused šempre govoril:

Vit ćeš ti kada vamin otac i mat partu na onaj drugi svit! Unda ćeš ti vit ča su braća! – Dabome, ja san ga samo pazil i mislil san se da ča un to govori? Oštija, pa braća su braća. Ali, kada se je to, nažalost i dogodilo, vidil san kako je taj čovik imil pravo, govori un meni, i kako me je na lipe i na vrime avizival i svitoval.

 

I ča nato reć, nego da se tako obistinjuje ona stara ćakula kada se braća dilu, da se nećeju dilit bratski. Da, složili su se da ne bratski – nego napol! A da ne govorin da va svemu tomu diljenju još svoj posal i voju igru igraju i geometri i njihvoi dugi metri, a da ne spominjen sud i svake sorti abukati. A jušto lipo zvoni va uhu ona beseda “bratski”, ma diboto kako da je z raja arivala. Ali isto neće niki da se dili bratski, tobože svakomu jednako, ne – nego da napol, svakomu polovica. Ne viruju jedni drugiman pa se zovu geometri i abukati, kako da braća ne znaju bolje od njih ča je njihovo. I kako ča san rekal, ako će doć abukat, unda na teren mora doć i geometar, pa vas unda i jedan i drugi jako grubo ogulu. I unda se mi i naprvo dilimo napol, a ne bratski, pa neka unda i oni drugi jako dobro brk omastu.

 

Eto, jušto zato bi sviman, pa i namin Rabljaniman leto tribalo durat celu godinu, da ljudi budu vajk dobre volje, da budu kuntenti, oću reć da i šoldi kaplju celu godinu, a ne samo dva-tri miseca pa ki ga ćapa-ćapa. I niki nebi mislil na vraga, nego na posal, a bilo bi manje vrimena i za sudi i abukati, pa bi se ljudi medase i više po bratski dilili. I nebi bilo one ćakule: da ne braski, nego napol!

 

Ben, ma niš od toga, nego sve gre po starinsku. Jedino se dvi novitade nedaju. Korona evo i naprvo luduje, a cene su se latile rast na gori. Za koronu nas duron gonu da se moramo cipat, a ja se pitan da kadi su in špunte za kuntra skupoće se cipat? Ala neka već jedan put i toga vraga zmislu.

 

Joso Fafanđel – za Kantunić, 8.10.2021.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime