Ispiši ovu stranicu
Nedjelja, 24 Listopad 2021 08:28

Rapski kantunić Josa Fafanđela: TOLIČ SAN BILA SCAT

Napisao/la Josip Fafanđel
Ocijeni sadržaj
(1 glas)
Rapski kantunić Josa Fafanđela: TOLIČ SAN BILA SCAT Foto: BDavid Duje Pahljina

Ma niman ča okolišat, nego ću van vreda reć uvako: Branka, moja nevča po sestri, šalje meni niki dan jednu sliku priko mobitela, a ja gledan i vidin školsku ploču va razredu punu računi od matematike i jednu klupu šoto nje. Kad piše ona meni uz tu sliku da malo hitin oko ča piše na onoj klupi.

 

I još je nadodala, da ki je rekal da naši gimnazijalci na Rabu, ne znaju čakavski. Kad šervivan ja da na klupi ne piše niš, ali zato pišu nika mića bela slova sprida unako po debljini od daske.

 

I raširin ja sliku, boj se danas i to more, kad piše uvako: Tolič san bila scat. I govori ona meni da dočim je to na roditeljskomu sasatanku vidila da se je naglas latila smijat. Ma otila san puknut od smiha, boj tuliko su mi se pijažale te domaće besede, a još su ih mladi i napisali. Kad pokažuje ona to svomu sinu Davidu, a un da govori kako je to napisano još lani i da je i un to slikal, boj mu se je isto pijažalo, ali da je malo razumil.

 

...ovaj mali, malo smišni, a malo i zanimljiv poručak na klupi va rapskoj gimanziji, zapravo govori i više nego ča se misli. A z druge bande, nemojte mi reć da od scanja i pišanja baš nima nikakove i druge koristi.

Ala šu, govorin ja njoj, homo to unda prevest: Tolič san bila scat, to bi zapravo bilo da je školantica zapisala, oli je poručila da se je malo prvo bila popišat, oli, pocurat, da ne bude baš jako grubo za reć. Inšoma, dvi besede su jako domaće: tolič i scat. Varamente ta slova na klupi su mića pa mi se je va prvu ruku činlo da piše: toliš san bila šcat. I zato san otil reć, kako bi i to bilo po domaću, boj više puti san čul da su naši stariji te besede znali i nati mod govorit. To pari i na jedan i na drugi mod. More se reć i tolič i toliš, more se reć i šcat i scat, a more se reć i poscat, oli pošcat, pa i pocurat. Mogla je znači napisat da se je tolič bila poscat. Ali na rubu od klupe je malo mesta, pa je baš pametno napisala najkraće ča je mogla, a isto je sve rekla: tolič san bila scat. Ben, ma za onoga ki to razumi (a Branka je razumila) jednako bi se kako i ona unako slatko nasmijal.

 

Ali još moran ku besedu o tomu reć. Makar ćete mi more bit i zamirit pa reć: ma koga vraga troši tuliko besed za jedno scanje i pišanje! Je, ali ni stvar samo o scanju, boj i Branka je pravilno zaključila kako je važno da su to mladi školanti zapisali i to jušto i šćeto unako po domaću, a i triba se i domislit da se to napiše sprida na klupu. Da ne govorin kako bi vridilo znat i ča se je zotin porukan i otilo reć. Boj, ako je to bila samo igra z domaćiman besedamin, i to je više nego lipo za čut.

 

Dabome, kako ča je i Branka rekla, to govori da naši mladi, više-manje još i znaju te besede. Kako ča je i David rekal, da un ni sve razumil, ali mu se ono napisano dopalo pa je i un to poslikal. I ne samo to, nego je važnije, da je i un rekal kako bi volil naučit te starinske, stare domaće besede. A to jopet govori da bi se o tomu moralo ćakulat i va školi. Boj škola i služi tomu da se uči i da se novo znanje akvištiva. A naučit svoju čakavštinu, more bit nabolje jušto va osnovnoj školi, i to bi bilo više nego korisno. I zato ovaj mali, malo smišni, a malo i zanimljiv poručak na klupi va rapskoj gimanziji, zapravo govori i više nego ča se misli. A z druge bande, nemojte mi reć da od scanja i pišanja baš nima nikakove i druge koristi. Da, da, tolič san bila scat, ma kako je to lipo za čut.

 

Joso Fafanđel - za Kantunić, 22.10.2021.

Pročitano 1259 puta