logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Subota, 05 Ožujak 2016 21:17

A ča je, a kadi su van... šugamani?!

Napisao/la
Ocijeni sadržaj
(1 glas)

Po sviman našimin mestiman z'ove bande Raba, durali su ovih dan sastanci za parićivanje turističke sezone. A hodila je po seliman cela kumpanija od vlasti, turizma i komunalij. I svaku večer bili su va drugomu našemu mestu. To je za pofalit, dabome. Boj to će na svoj mod pomoć ljudiman da se za sezonu ča bolje parićaju, a oni ča o tomu vodu računa, oni će ju isto doznat ča sve ne gre kako po loju, pa kuliko budu mogli to ćeju malo po malo i znivelivat.

A drugo, naši ljudi volu malo i vit sva ta naša rukovodstva, pa ih unda malo i podbadat. Više puti i za ono ča triba, a više puti i za ono ča ni oni nisu krivi, oli ne moru sami oblašat. Boj, oli ni šoldi za sve, oli niki posli činu oni gori na malo višljoj skalini od vlasti.

Ben, ma otil san reć da kada se naši glavni kalaju malo doli med ljudi, unda je to zazbilja prlika da in se prezentaju sve, pa i one najmanje falinge od svakoga nešega mesta. Od kakovoga puta, zidića, mula, šporkice od smeća, i takove sve lipe oli grube stvari.

A govorin to zato, boj san jušto niki dan malo poslušal onu nesritnu aktualnu uru od našega Graskoga vijeća. I bilo mi je drago, recimo čut, kako je onaj Matijević rekal da se njemu pari kako ovo ni sastanak od Graskoga vijeća, nego mjesnoga odbora, va mjesnoj zajednici. Otil je reć, kako se na graskomu sastanku govori o zidićiman, mociramin i strošku za Novu godinu, a da one važnije stvari niki ne spominje.

Eto, a i meni se je to parilo na isti mod. Parićana su unaprid pitanja, pa se unda od njih više čini pulitika nego posal, tobože, ča i naki modi poć naprvo.

A za one manje oli veće komunalne stvari neka se lovu posla komunalci, uprave i turistička zajednica. Ako se je kadi rastakala mocira, to valja prijavit, komunalnomu inšpektoru, oli Dundovu, a ne Graskomu vijeću, pa ni gradonačelniku. Oni neka se latu ozbiljnijega i većega posla, a ima ga kuliko oćeš, nebojse. A ima i ljudi ki su za sve to i plaćeni.

Pa sada kada svi redon po našiman mestiman čuju takove svakojake predike i sinjaju va librići sve moguće falinge, svi bi oni morali malo i rukavi zasukat, pa udri baren zeru leštije po poslu. Ben, ma kada o tomu govorin, ja se vajk domislin našega pokojnoga kamporca, nidanjega Frana Židine, ki na poslu ni baratal z olovkon, nego z lopaton, a duron je po leti kolo vrata nosil jedan veli šugaman da mu pot pospužviva.

Unda bi Gradu na obali kuntrival svi oni službenici ča bi hodili doma od posla, z črniman orćaliman na očiman, pa bi in samo rekal: „A ča je, a kadi su van... šugamani?!“

Pročitano 1666 puta

Ova e-mail adresa je zaštićena od spambota. Potrebno je omogućiti JavaScript da je vidite.
Više u ovoj kategoriji: « Maškri bez maškar Tlak od života »

seakayakcroatia