Home Beseda po domaću A ča je, a kadi su van… šugamani?!

A ča je, a kadi su van… šugamani?!

0
A ča je, a kadi su van… šugamani?!

Foto: RabDanas

A drugo, naši ljudi volu malo i vit sva ta naša rukovodstva, pa ih unda malo i podbadat. Više puti i za ono ča triba, a više puti i za ono ča ni oni nisu krivi, oli ne moru sami oblašat. Boj, oli ni šoldi za sve, oli niki posli činu oni gori na malo višljoj skalini od vlasti.

Ben, ma otil san reć da kada se naši glavni kalaju malo doli med ljudi, unda je to zazbilja prlika da in se prezentaju sve, pa i one najmanje falinge od svakoga nešega mesta. Od kakovoga puta, zidića, mula, šporkice od smeća, i takove sve lipe oli grube stvari.

Rab danas oglas

A govorin to zato, boj san jušto niki dan malo poslušal onu nesritnu aktualnu uru od našega Graskoga vijeća. I bilo mi je drago, recimo čut, kako je onaj Matijević rekal da se njemu pari kako ovo ni sastanak od Graskoga vijeća, nego mjesnoga odbora, va mjesnoj zajednici. Otil je reć, kako se na graskomu sastanku govori o zidićiman, mociramin i strošku za Novu godinu, a da one važnije stvari niki ne spominje.

Eto, a i meni se je to parilo na isti mod. Parićana su unaprid pitanja, pa se unda od njih više čini pulitika nego posal, tobože, ča i naki modi poć naprvo.

A za one manje oli veće komunalne stvari neka se lovu posla komunalci, uprave i turistička zajednica. Ako se je kadi rastakala mocira, to valja prijavit, komunalnomu inšpektoru, oli Dundovu, a ne Graskomu vijeću, pa ni gradonačelniku. Oni neka se latu ozbiljnijega i većega posla, a ima ga kuliko oćeš, nebojse. A ima i ljudi ki su za sve to i plaćeni.

Pa sada kada svi redon po našiman mestiman čuju takove svakojake predike i sinjaju va librići sve moguće falinge, svi bi oni morali malo i rukavi zasukat, pa udri baren zeru leštije po poslu. Ben, ma kada o tomu govorin, ja se vajk domislin našega pokojnoga kamporca, nidanjega Frana Židine, ki na poslu ni baratal z olovkon, nego z lopaton, a duron je po leti kolo vrata nosil jedan veli šugaman da mu pot pospužviva.

Unda bi Gradu na obali kuntrival svi oni službenici ča bi hodili doma od posla, z črniman orćaliman na očiman, pa bi in samo rekal: „A ča je, a kadi su van šugamani?!“

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime