logo mix

Rab Danas

Nezavisni internetski portal otoka Raba

Gif animacija za zapoljavanje 2000x240px

 

Petak, 04 Veljača 2022 22:16

Rapski kantunić Josa Fafanđela: MODA

Napisao/la Josip Fafanđel
Ocijeni sadržaj
(4 glasa/-ova)

Još vajk je zimski štajun, a korona i naprvo dura jedino ča je ime prominila - ni više korona nego omikron! Ben ma to su stvari ke nas odavna već muču i malo se toga o tomu više i more reć, a ja bi volil za ovo doba godine i kakove drugojačije novitade. Ali malo mi toga ariva pod ruku za kakovu novu ćakulu učint.

 

Da, triba nove traperice na kolenima rasparat, pa neka bura šćiplje po goliman koleniman. Ben, ma o tomu san već više puti hitil ku besedu, ali ne moren od manjega da jopet ku priko zajika ne prehitin.

Ma ne zato boj da je po zimi čovika manje volja za ćakulat, nego recimo - po leti. E lako je po leti ! Po leti kako da sve na svoj mod pošuškavi, a diboto i mlado i staro, pa se duron niki vrag dogaja. Puno je i gosti pa je sve skupa va jednomu velomu šušuru. A da ne rečen kako je sve i va golotinji boj je teplo. Ala šu, ma nismo baš svi zasvin goli, ali puno se more trehit onih skarsih kotolićev, uskih gaćic ča se ozad i ne vidu, oli tankih buštinov ča ni pol toga ne pokrivaju. Oštija, a leto je leto i zato se to ne more šervat sada po zimi. Dabome, po zimi smo svi skupa va teplu robinu zakolomučani, kako mi stariji tako i one mlade divojčice.

 

Ben ma valja reć kako taj mladi svit isto čini po svoju. I ozgora i ozdola se do grla zakolomučaju, ali kolo pasa su redovito gole. Gaće su jako šoto pupka, a ona robica ozgora je basa pa in ne more ni dimnja pokrit. Tako dočim sedu na katridu ozad su do pol hila gole. Pa da neće doć bolešćina. A kako neće! A same sebe varaju, boj tobože da su obučene va teplo, a napol su gole. Da ne rečen kako je sada arivala i još jedna nova moda. Da, triba nove traperice na kolenima rasparat, pa neka bura šćiplje po goliman koleniman. Ben, ma o tomu san već više puti hitil ku besedu, ali ne moren od manjega da jopet ku priko zajika ne prehitin. A kako neću kada mi se to svaki dan prid oči petiva. Da ne rečen kako to brate baš i ni jako lipo za vit, a još ni zdravo ni, dabome. I unda mi ni ćaro zač to tako mora bit. Oštija, govoru, a ča se čudiš, pa moda je moda! Ki misli na zdravlje.

 

E, a na svoj mod to su sada i muški počali duperat. Ala šu, muški ne pokažuju pupak, ali recimo - svi redon su se počali šiškat na golo. A jopet poradi mode, a ča drugo. A ki je to vidil - nosit obrijanu i golu glavu po zimi! Na rukah debele rukavice, na nogah one teške čižmine jušto kako da se na front parićivaju, kolo vrata ona debela šarpa naduplo zamoćena, a glava obrijana i gola. Pa neka bura puše, a timenica zebe. Ni kapa na glavu se ne stavlja boj da se unda ta moda ne vidi.

 

A to govorin zato boj san i ja to jedan put proval. Da, ma ne po svojoj volji nego su me va vojski bili na isti mod na golo ostrigli. I ni bilo po zimi nego tamo va devetomu misecu, ali ja i dan-danas pametin kako me je isto glava zebla. I to ne samo va hladu nego kada bi se i na sunce nabandal. A bilo nas je i smišno za vit pa bimo se jedan drugomu rugali i smijali. Da ne rečen kako mi se je to znalo dogodit i kada san bil mići diško. Ošiškali bi nas na golo najviše unda kada bi se po namin šenci pokazali. Pametin kako bi me unda jedan moj sused, nažalost već odavna pokojni, pital da ki me je tako grubo ošiškal? Ja bi rekal ki, a un bi nako po starisku nato rekal: A brate moj - poseren mu se na posal!

 

Napisal: Joso Fafanđel - Za Rab Danas, 4.2.2022.

Pročitano 897 puta

 

 RAT1 600

seakayakcroatia

 

BANNER350 BarbaSIME1