logo mix

Rab Danas

Nezavisni internetski portal otoka Raba

Gif animacija za zapoljavanje 2000x240px

 

Utorak, 08 Ožujak 2022 02:36

Rapski kantunić Josa Fafanđela: UZ OSMI OD MARČA

Napisao/la Josip Fafanđel
Ocijeni sadržaj
(4 glasa/-ova)
Rapski kantunić Josa Fafanđela: UZ OSMI OD MARČA Foto: Kristina Ribarić

Evo, i osmi dan od marča je arival! Jedni ga zovu Dan žena, a drugi Majčin dan, a ja ne marin je uvako oli unako, nego se tornivan na ono kako smo taj dan duron poklanjali ženskiman. Redovito uz lipu rič, uz cvetić od galohara, ča oće reć, na prvomu mestu - uz ljubav.

 

Za mene je to i više nego veli biserni kural, del naše starine i duša našega domaćega čovika, duša od težaka ki je umil i na drugi mod mislit, pa unda sve to i na kartu zapisat.

 I jušto ovih dan malo študijan, tobože da ča ove godine o svemu tomu hitit na kartu. Varamente, nisan imil baš ni puno volje, boj evo, po svitu se i grube stvari dogajaju. Korona je dešvala puno toga ča se je med ljudima tribalo dogajat, pa i ljudski životi je vazimala (a i još vazimlje), a unda je arival i onaj nesrićni rat va Ukrajini, novo zlo ko jopet nosi nesriću i zla svake sorte.

 

I sve se tako mislin ča ću i kako ću, kad evo ti ga na, zaviril san se na internetu va priču ku je prezentala vridna naša Kristina Ribarić. Slikala je jednu pismicu, pa je šoto napisala da je i njezin ded pisal pisme, a oni va fameji da su to jušto ovih dan doznali i va jednomu libriću z rukan zapisano pronašli.

 

A ja nisan mogal od manjega nego san je vreda zamolil kako bi ja taj librić volil pročitat. Ja zamolil, a ona unako pametna i vridna kakova već je, ona je to vreda veselo dočekala, otac se je isto složil, i ni dvi ni tri, nego evo librića već pridame na stolu. Za mene je to i više nego veli biserni kural, del naše starine i duša našega domaćega čovika, duša od težaka ki je umil i na drugi mod mislit, pa unda sve to i na kartu zapisat. Malo sam zapisat, a zeru i od drugih prepisat kada bi na kakovu lipu pismu naletitl. I još skromno mučat da to niki ne zna i da bude del samo njigovoga duhovnoga svita. Onoga z nutra, dabome.

 

I tako fala Kristini i njezinomu dedu ča su nati mod prezentali najbolju temu i dar za Dan žena. Ma ni ona kitica galofara više ne triba, sve ovo more i bez nje pasat.

I tako fala Kristini i njezinomu dedu ča su nati mod prezentali najbolju temu i dar za Dan žena. Ma ni ona kitica galofara više ne triba, sve ovo more i bez nje pasat. Pere Ribarić (a govoru da su ga zvali Perić) pisme je svojan rukon napisal i zapisal va vojsci, odavna već va Pločamin 1957. godine. Pisme po domaću i pisme na njigov mod. Va napisanoj pjesmarici pobrojili smo ih puno, a sve redon pune su ljubavi i tuge za krajen i svojiman ki su ostajali doma dokli su mladići va vojsku putovali i svoje divojke ostavljali. Puno pisam va velomu libriću, ali danas kako poklon sviman ženskamin za Osmi marča, evo samo del od jedne ka o ženskiman i vičnoj ljubavi i pripovida. Librić, oli pjesmarica započinje uvako:

 

Na prvoj te pitan strani

O moj cvijete odabrani

Kako živiš, jesil zdravo

Odgovori meni pravo...

 

Od jada mi srce grane

I ne spavam dok ne svane

Niti mi se više drema

Kada vidim da te nema

A čim rujna zora sine

Oblačim se i ustanem

 

Uzmem papir i olovku

Da bi meni lakše bilo

Pa po karti pišem, šaram

Da sa tobom razgovaram

Kada stanem da ti pišem

Stalno mislim i uzdišem

 

Ma i tebi moje zlato

Časnom riječju to je dato

Nije ljubav mala briga

Od sto kila to je knjiga.

 

O ovomu Perićevom libriću još će se pripovidat. Za sad zafalimo njemu, njigovoj Kristini i sviman njigoviman ča su ovu pjesmaricu zneli van na svitlo dana, ča su je prezentali i namin ki jednako za nju nismo znali. Libar je to pun ljubavi ki se najviše ženkomu rodu obraća i to jušto evo- za Dan žena. Sve čestitke zato i ženskamin i ljubavi ka šnjiman uvik zajedno gre, uz još par kitic za kanatu.

 

Dok se dušo ne povratim tebi

Ti mi vjeruj kao sama sebi

Ti si moja od ljiljana grana

Na mom srcu i velika rana

I ova će rana preboliti

Ako mi se bog da povratiti

Sva će tuga proći od srdašca

Kad ti stavim ruku u njedaršca.

 

Napisal: Joso Fafanđel - Za Rab Danas, 8.3.2022.

Pročitano 789 puta

 

 RAT1 600

seakayakcroatia

 

BANNER350 BarbaSIME1