Foto: Foto: Josip Fafanđel
Ali i naprvo se čudovite stvari dogajaju. Ovi na televiziji duron pripovidaju o nikiman vražjiman klimaskin prominamin. Jedni tako govoru da ćemo jednoga dana svi zgorit, a drugi jopet da će se cela zemlja zasvin ohladit. Kako je da je, ma meni ni jedno ni drugo ne odgovara. Ali unda se poveselin kada reku da će se to dogodit za jedno 200, 300, oli more bit i 1000 godin. A lipo brate, a koga vraga nas unda strašu? A kadi ćemo mi bit za par hiljad godin?! Ala šu, april je bil malo hladniji, a maj je jopet malo tepliji, ma računan da to nima nikakove veze zotin vražjin zatepljenjen oli zahlađenjen, boj pametin da san se jedne godine i na dan od Vazma mori kupal, pa računan da će toga još bit.
Prekinuli su i one nesrićne kovid-potvde ke su nas više dilile nego čuvale, pa sada i poradi toga moremo laglje laurat, boj nas manje toga brenza. Zneli su nan z ust i maske, oli trubice va kiman nas je bilo grubo za vit, a više puti nismo mogli jedni drugih ni prepoznat. Inšoma, i korona je najedanput nestala i to jušto priz Vazan kada nan prvi gosti arivaju. A koga smo vraga unda i bili ljuti na koronu kada, evo i ona razumi kada mora fermat i poć ća. Dočim su prvi gosti arivali na odmor, ode korona da nan se ne miša va posal, da ne smeta i da nan ne čini ruvinu od sezone. Ma ča ni to lipo od nje!
Inšoma, a ča da van rečen. Oće bit zateplenje oli će bit zahlađenje, to ni vrag ne zna. Ali isto se vidi da je va zadnje vrime ma šćeto jako zavrućilo gori va našemu Zagrebu. Med oniman na vlasti, dabome. Oli zahladilo, kako se već vazeme. Zikarali su se medase, a karaju se i naprvo. Kako va Saboru, tako i naši prešidenti medase. Ma jušto kako dica. I ala šu, dobro je da se ki put malo i pokaraju, ali da se pokraju na poslu, tobože, va forci i volji i jednih i drugih i trećih da sviman namin bude bolje. To bi već bilo ono pravo karanje. Da, da se medase gombaju ki će od njih više učint dobroga za svih nas. Ali ne vraže, nego se oni jopet karaju kolo ustašov i partizanov, a najviše kolo udbašev i nidanje Udbe. A ljudi su već nato bili i zaburavili, da ne rečen kako ovi mladi ni neznaju ča je to Udba, boj va to vrime nisu bili ni rođeni. A i oni ča su va to vrime i bili va toj vražjoj Udbi i oni su već stari, a bojin se da ih je jako malo i živih. E, ali mi pametni kakovi jesmo, mi sada sve to prehićujemo na dicu, tobože po onoj narodnoj da jabuka ne pada daleko od stabla. Ali bojin se da to ni dobro nati mod govorit, boj ljudi nisu jabuke. A ki to more reć, da ako je moj otac bil lupež (a ni fala Bogu), da san unda i ja lupežina. Ali diboto, more se to i napak reć. Tobože, more otac bit i pošten, a dite da ide na štrambo. Zato bi ja rekal da se ovi naši pulitičari malo priko mere zotin igraju, a bilo bi bolje da se latu pametnijega, za ne reć i korisnijega posla. Ako niš drugo, da rivaju medase ki će veći posal učint, da činu red va državi i da redu teren na komu ćemo svi bolje živit. A da ne spominjen onih kiman je potres kuće šundral, pa već dvi godine, na našu sramotu, živu ne kako ljudi nego kako puži va maliman kućicamin.
Da, tako stvari stoju gori po Zagrebu i to jušto sada kada su fermali i prekinuli one nesrićne mire za koronu, pa nan se otvara još veća sloboda za bolji posal. Prekinuli su i one jednako, ako ne i više, nesrićne kovid-potvde ke su nas više dilile nego čuvale, pa sada i poradi toga moremo laglje laurat, boj nas manje toga brenza. Zneli su nan z ust i maske, oli trubice va kiman nas je bilo grubo za vit, a više puti nismo mogli jedni drugih ni prepoznat. Inšoma, i korona je najedanput nestala i to jušto priz Vazan kada nan prvi gosti arivaju. A koga smo vraga unda i bili ljuti na koronu kada, evo i ona razumi kada mora fermat i poć ća. Dočim su prvi gosti arivali na odmor, ode korona da nan se ne miša va posal, da ne smeta i da nan ne čini ruvinu od sezone. Ma ča ni to lipo od nje!
A naši pulitičari se latili karat. Z druge bande gledan na telviziji puno mladoga svita ki su svi redon samo doktori i magistri. Pa ča oni ne bi došli gori na vlast, pa da svojin znanjen baren oni učinu kakov-takov boljitak. Oštija, znanje puno more. A kada znaju unda neka zemu komandu i neka ovaj naš slabo zabrivani brod stavu va pravu rutu. Neka hitu stara vesla kvragu i neka va brod namestu kakov šestan i muderan mutorić. Da partimo već jedan put naprvo. Prije puno godin smo manje i znali pa smo isto nikakor, makar i starima vesliman, vozili naprvo, a ne nazad. Šempre se je va školamin dogajajlo da su dica zazbilja jako malo znala, ča ni nikakovo čudo boj po kućamin ni bilo ni olovke, a kamoli svih onih mudrih libri ča ih danas imamo. A i telviziju, internet, mobiteli i novine, a sve brate, samo ki ima volju ča to naučit.
Za jedan primjer jušto su mi ovih dan povidali kako je va ono staro vrime jedna učiteljica (ovo ude kod nas na Rabu) va razredu pitala da ki zna ča je to bruto, ča je neto, a ča je tara. A nato da je Joso Banov prvi digal ruku, pa da govori: Ja znan, učiteljice: Bruto van je moj stric, Tara je moja teta, a ča je neto, e to van nebi znal rećEto, a danas svi to znamo pa ni druge nego, a baren vesla more pa voga naprvo!
Joso Fafanđel – za Kantunić (13.5.2022.)
