logo mix

Rab Danas

Nezavisni internetski portal otoka Raba

Gif animacija za zapoljavanje 2000x240px

 

Srijeda, 25 Svibanj 2022 17:03

Rapski kantunić Josa Fafanđela: KATAMARAN

Napisao/la Josip Fafanđel
Ocijeni sadržaj
(3 glasa/-ova)
Rapski kantunić Josa Fafanđela: KATAMARAN Foto: Wikipedija, slobodna enciklopedija

Sve se mislin oću oli neću, ma ala šu, povidat ću van jednu moju sramotu, a ta je da san se onoga pasanoga prvidna po prvi put va životu vozil z katamaranon. Komu god to povidan ne viruje mi. A nisan pa ča! Ni bilo potribe i gotovo. Ki put bi šal do Rike z auton, ali s katamaranon nikad. Pa eto, i to san proval. Lipa vožnja, pa još bonaca, a ča je najvažnije, za nas penzijoneri i za niš. Ma kadi to ima, da mi je znat! Tako se na komodu vozit i još za niš. Zato ovi naši valja ki put i pofalit za ono ča nan va životu i ča to lipoga parićaju.

 

...Ali kada su kalali skalu za poć van na rivu, počali su oni na nas kričat - da brzo, brzo, ala brzo van boj da već kasnimo. A jopet sve napak, a ča drugo, boj misto da mi trubimo na njih zač tuliko kasnu, oni trubu na nas da brzo van boj da oni kasnu.

Jedino ča ovi naši domaći ne činu dobro. Oštija, a ne daju nan parkirat auto tamo kadikod blizu katamarana. Jedan mi je prije par dan povidal, da su mu rekli kako more parkirat na rivi, ali da nutra stavi biljet od najmanje 20 kun. I da će ju oni unda razumit da je to auto od čovika ki je šal na katamaran. Kad niki dan da jopet un pita, da ča je zotin, ako to još vridi, pa da su mu oni va Dundovu rekli da jok!, niš od toga. Svaki ki će poć na katamran i ostavit auto na rivi da mora platit kartu prkiranja za celi dan i to u vridnosti od 120 kun. A lipo bogami, govorin ja sam sobon, ovi me vozu va Riku i nazad za niš, a naši oće da mi zgulu 120 kun, i diboto jopet za niš. Ma ča ne bi bilo lipo da i oni najdu kakovo rešenje, recimo kada kupiješ kartu za katamaran da moreš tamo kupit i posebnu kartu za parkiranje do vrimena dokli katamaran ariva nazad. Ala šu, po ceni za jedno 20, oli 30 kun, recimo. Oštija, a za Dundovo je bolje i to nego niš.

Na kanati, kako se ono reče: vuk sit, a koza cela! A uvako ne zaradu niš.

 

A ča ćete, trošin ja besede, ali sve me je ma šćeto jako strah da će me ki poslušat. A tudi ni veloga posla. Triba samo malo znat mislit, pa svaka mala dojde čoviku na pomoć. Oštija, a zrno po zrno pa dojde i pogača. Boj kakov je to posal da ja moran dopeljat kufer, oli kakovu veću torbinu z auton na rivu, tamo sve to ostavit, a unda popeljat auto nazad kolo pijace na parkiranje, pa unda jopet nazad pješke na rivu. A more se dogodti da mi još ki i torbu ukrade. Oli tako, oli moran nikoga zamolit da me popelja na rivu, oli zvat taksi da me tamo prehiti. A jopet za šoldi, dabome. Ma sve napak i komplicirano, a more bit rešeno na pravi mod i na komodu. I još svi kakove - takove koristi od toga moremo imit. A evo, ja san svoje mišljenje rekal i više od toga niš ne moren pomoć.

 

Ala šu, jedino moran malo i katamaran kritizirat, boj od Rike na Rab smo došli ne 10 do 5, nego smo koštali na 5 i 20 minuti. Zač su tuliko kasnili to ni vrag ne zna, boj niki niš ne govori, a partili smo na vrime od Rike. Ben, ma to ni tuliko važno, svi smo mučali i nikomu niš. Ali kada su kalali skalu za poć van na rivu, počali su oni na nas kričat - da brzo, brzo, ala brzo van boj da već kasnimo. A jopet sve napak, a ča drugo, boj misto da mi trubimo na njih zač tuliko kasnu, oni trubu na nas da brzo van boj da oni kasnu. A jadna dica su potezala sobon nike vele torbine na kolićiman, pa misto da in pomoru, oni još trubu na njih da brzo, brzo... Ma samo ča nisu zeli kakov dugi prut va ruke pa udri po namin kako po voliman kada se ono jedanput šnjiman na njivi oralo.

 

Ala šu, reć ću van i to da san bil va Riki proslavit 57 godin moje mature. I već drugi dan smo va kafiću ćakulali o timan maturamin, a Ive Perkić to sluša, pa govori: E blago vamin!  - Ča je Ive, pitamo ga mi, zač blago namin? A un nato govori: Vi i mature slavite, a ja jadan više ni to ne moren.

 

Mi smo se svi malo popazili, ali smo vreda sve i razumili, boj kako će i moć slavit, kada ima 94 godine, a njigovi su odavna već svi pomrli.

 

Joso Fafanđel - za Kantunić (25.5.2022.)

Pročitano 616 puta

 

 RAT1 600

seakayakcroatia

 

BANNER350 BarbaSIME1