logo mix

Rab Danas

Nezavisni internetski portal otoka Raba

×

Upozorenje

JUser: :_load: Nije moguće učitavanje korisnika sa ID: 745
Nedjelja, 01 Svibanj 2016 14:57

Zbevandani blavdan od radnika i težaka celoga svita

Napisao/la
Ocijeni sadržaj
(1 glas)

Evo nas va danima od prvoga maja! Tobože blavdana od radnika i težaka. I to ne samo našega domaćega, nego težakov od celoga svita. Ali zaman, boj kuliko čujen sindikati da će za prvi maj štrajkat. A to pari da držva za njih ne mari priko mere. A kuliko san mogal šervat va katoličkomu kalendaru i crikva je težaka i radnika hitila na bandu. Boj čitan, piše tamo da je prvi maja 6. Uskrsna nedilja, a samo malin sloviman va zagradi piše da je i državni blavdan. Samo državni, ma ne ki i čigov blavdan. To pari da svi pomalo dižu ruke od radnika - i država i crikva. Misto toga danas se vajk spominju samo poslodavci, njiman da triba dat sad ova, pa sad ona prava. Zato ću jopet reć ono ča san i zdanjega puta rekal, tobože, da san nideri va novinah pročital kako se je danas sve napak obrnulo. Boj da su prije radnici i proleteri iskali pravdu i posal, a danas da to činu poslodavci - kapitalisti. A radniku - jedan - ma veli... kacamarin.

Oćo, kuliko iman navar govori se da je posla sve manje. A nati mod je bilo i prije više od 130 godin, kada je prvi maj i stvoren kako radnički blavdan. I to se je dogodilo jušto va Merikah, ne migo kod nas. To pari, tamo kadi je bilo posla, ali je za radnika bilo i vele nepravde. Zato je prvoga maja 1886., va Merikah, va Čikagu, štrajkalo ni manje ni više nego priko 40.000 radnikov. Toga puta se je prvi put čulo za one tri osmice ča su ih radnici iskali, tobože: da osan uri rada, osan uri za odmarat i osan za kulturu i napridovanje. Ali misto toga, vlasti i pulcija su učinli nered, puno je ljudi pretučeno i zatvoreno, a nažalost, bilo je i onih ki su i glave zgubili. Sve je to potle doplavalo priko mora i va Evropu, pa su borbe za radnička prava bile po celemu kontinentu. A zapisano je kako su jušto Hrvatska i Slovenija prve slavile prvi maj i to već 1890. godine.

A danas se je to malo i zbevandalo, makar evo, va Zagrebu nanovo proteštiraju. Ben, ma sve mi se pari da će manje ljudi bit va proteštu, a sve više po gušćiman i na zelenoj travici kadi se navelo peku janjci i ložu gradele. Tobože, udri brigu na veselje. I to je, varamente, lipa parola, boj nima bolje stvari nego živci zašparat. Ali to moru reć jedino oni ki danas imaju kakov-takov poslić, ma oni ki su bez posla, bojin se da njiman neće bit do pivade i gradel. Da, da - imil je naš kapelan Depikolozvane pravo, ono kada je nedilju rekal, da ni više kuge, ali da se kolo nas i naprvo kupu nike druge, i male i vele bolešćine. Pa unda kako i naki mod imit kuraja za ljudima reć: Sretan van prvi maj, praznik rada!?

Pročitano 1241 puta

Ova e-mail adresa je zaštićena od spambota. Potrebno je omogućiti JavaScript da je vidite.
Više u ovoj kategoriji: « Kvragu i stres Apoksiomen i naš lule »

seakayakcroatia