Ma čujen da su naši vatrogasci ovih dan bili z brodon malo navigat. Vreda san rekal: bravo, boj oni su to i zaslužili. Po celomu svitu i dan-danas goru ognji, a kod nas na Rabu ne samo da ne gori, nego naši vatrogasci još i po moru navigaju, lipo na miru počivaju, veselu se i zausput još i ku ribicu ćapaju. I neka, boj su to zazbilja i zaslužili. Svake godine, a ne samo ovoga leta kada se poradi njih Rab more nanovo pofalit da veloga ognja kod nas jopet ni bilo. Zato bravo kumpanijo od našega DVD-eja, navigajte i naprvo potle svakoga leta, navigajte mirno i jedino imite navar boj, nedaj Bog, i brod se more nagorit.
Ne ove šetemane, nego odavna već, jednu san pismicu naspisal, a rekal san neka se zove - Daži.
Jugo puše / Oblak biži / Mokrinja se za robu ćapiva / A daži / Samo daži. / Kite kaplju / Sve je mokro / Pušća cerada / Voda toči / A daž pada i pada. /
Zemlja se natopila / Kabanica promočila / Trava leži / A beštije se rivaju i štišću / Nebo lampa i grmi / A vajk i duron / Samo daži i daži.
Ne pametin kada san va zadnje vrime zel krnoćal varuke. I nećete virovat, tobože, ča me to zanima i ča to gren van s krnoćalan redovito popazit? Oni od sulaca će ju promislit kako gren pazit kakovu mladu žensku. Ali ni to, a bilo bi bolje da je tako, nego svako tuliko virin gori va naš Velebit.
Rapski tanac? Da, Rapski tanac i - kapa doli. Evo uvako: va zadnjih godinu dan gledal san tri priredbe ke su me mogle malo kolo srca požašćat. To su: Rapska fjera (vajk dobra i ne se va nju puno pačat), lanjski Festival miha va Loparu i Koncert FD Rapski tanac (30 godina), prid par dan Gradu va dvorani. Bravo i čestitke za 30 godina rada! Bravo i za njih, bravo za gosti, bravo za program, bravo za sliku pozornice i bravo za razglas.
Va Novomu listu, dan-dva potle mesopusta, pisalo je uvako: Maškarana mladost zasjenila zlotvora Piškanca. Bravo, mislin se ja! Ala sada lipo zamislite da je recimo potle maškar na Viškovu pisalo va novinah isto uvako: Maškarana mladost zasjenila Halubajske zvončare. Svi bi to doživili kako škandal, dabome. A mi na Rabu niš, jušto kako da se niš ni dogodilo ni. A dogodil se je jušto škandal. Ako je mladost debandala Piškanca, a ča je to drugo nego škandal?
Inšoma, govori se da je Valentinovo dan od ljubavi. Niki dan, a potle više od dvajset godišć, otvoril san ja jednu starinsku škrinju va koj na šufitu (granaru) čuvan nidanju robu još od moje pokojne babe, a jedan del i od matere. Med tan robon našal san i jedan stari kapot od moga pokojnoga oca, a va taški od toga kapota napipal san i jednu zgibljenu karticu. Otvoril san je, a va njoj z rukan i običnon olovkon napisana je jedna pismica, od celih celcatih 59 kitic. Pismica je ljubavna dabome, a zove se "Kako je teško dragu ostaviti". Evo ga, rekal san sam sebi, evo malo starinske ljubavi, jušto za Valentinovo.
Tri dana ljute bure i tri dana letrike. Pa tri dana bonace, a tri dana bez letrike. Evo i ovu ćakulu pišen priz nagorenu šteriku, pa mi se prijtelj ruga da san kako Lav Tolstoj, a ja mu govorin da je Tolstoj baren znal da nima letrike, a mi znamo da je imamo, a nikad neznamo kada će nestat, a još manje kada će nanovo arivat.
Ono ča se je pasane šetemane kalalo na Rab i druga mesta kolo nas, a i dalje od nas, ne more se reć da je naše redovito zimsko vrime. Kada bura malo jače zapuše ki ta se zna jadat i njurgat na takovo vrime, ali oni drugi jopet znaju reć uvako: Ala muči, ne jadaj se, bura je pravo naše vrime! I ja bi se zotin složil. E ma bura je bura, ali ovo ča je puhalo pasanoga utorka, pa unda duron i celu sredu, a ne, to ni bura, to je šijun, zlo od veloga vetra, oli jušto Sodoma i Gomora, vrag pakleni.
Sezona je finila, a na onoj fešti - Kanati va našemu Varošu, da su najbolji bili jušto brunčići. Zato valja pofalit onih ki su se toga domislili, tobože, da se na toj fešti od kanate sezone kuhaju i gulaši oli bruditi va onima našiman starinskiman brunčićiman. I ne samo to, nego da se ljudi i takmiču ki će bolju spizu i parićat va timan brunčićiman.
