logo mix

Rab Danas

Nezavisni internetski portal otoka Raba

Petak, 28 Prosinac 2018 18:05

In memoriam - JAKŠA FIAMENGO (1946. - 2018.)

Napisao/la Josip Fafanđel
Ocijeni sadržaj
(4 glasa/-ova)
In memoriam - JAKŠA FIAMENGO (1946. - 2018.) Foto: Hrvoje Hodak

Jušto potle Božića napustil nas je pisnik i akademik, Komižanin i Višanin - Jakša Fiamengo. Zač ga spominjen? A poradi puno stvari bi ga tribalo spominjat. A ovih dan će se puno riči o njemu i zaredat: na Visu, va Komiži, va Splitu, a i po celoj državi. A kako puno riči i ne bi bilo kad je umrl čovik, pisnik, novinar i akademik.

 

A i na Rabu ga moramo spomenut. Zapravo ovo je prlika da va spomin tornamo tri čovika zajedno, sva tri evo, i na velu žalost, već pokojna: Ljubo Stipišić, Ugo Belamarić i Jakša Fiamengo. Boj svi tri su bili kako z kadinamin vezani za naš domaći pisnički Ča vrh Arbe.

Ljubo je sve začal i porival, Ugo je organiziral, a Jakša bi redovito arival i va našemu kinu čital svoje pisme.

Tri čovika i tri prijatelja na kanati. Porivalo je to naprvo i nas čakavce na Rabu i zato in vela, vela fala.

 

I kako ča san rekal, o Fiamengu će puno njih ovih dan govorit, a ja ću se samo vezat za jednu njigovu pismu ku je 2016. čital kod nas na Rabu. Jušto ta pisma je na niki mod vezala i njega i mene.

Pisma se zove: NARESLA JE TUTUVICA.

 

Naresla je tutuvica i kupina sve pokrila,

Profundala se je riva, ni Komiže di je bila.

Portili su naši stori, ku pul grebih, ku pul kraja,

S teraferme gledot škoje ne pjažo nos, ni kuraja.

Di smo bili, ca smo bili, vej se niku ne spominje,

Potenila stina viško, izilo je more sinje.

 

Ol ložjo su još ostali trinkuni i suhi hrebi;

Privolile se gomile, zjanuli u nebo grebi.

Lug je posul naše joci, zatapjala naša tvica,

Sve je, muj Mikula sveti, sve priresla tutuvica.

Di smo bili, ca smo bili vej se nikur ne spominje

I ol svega je ostalo somu more, more sinje.

 

Zač ovu njigovu pismu spominjen? Spominjen je zato boj san se vajk pital ča je to ona tutuvica, ka je po Komiži sve priresla? Druge godine evo Jakše jopet na Rabu, a ja san vreda navalil da mi povida ča je to tutuvica ku va pismi spominje.

Mučil se je, ali ni mi mogal povidat, a ni ja nisan mogal kapit, pa smo se složili da će mi druge godine sve reć i bolje prezentat. Ali sudbina je otila da se više nismo kuntrali, ni ga bilo na Rabu, a na velu žalost neće ga više ni bit. Zamukal je njigov glas, zanimila je nijigova pisma, ali zasvin virujen da mu ni grob, ni njigovo dilo nikad neće prirest ona njigova nesrićna tutuvica. Ala komiške lanterne - za vajk će Jakša svitlit.

 

  • Josip Fafanđel, Rab, 28.12.2018.
Pročitano 863 puta

seakayakcroatia