Foto: Foto: Hrvoje Hodak
I rekla je uvako: Virujen da će moja Murtelica lipo zadušit i pokazat svoju lipotu sviman ki je ne poznaju. Ona je simbol loparskoga kraja, sinjal kulturne starine i sigrno je da će kako takova obogatit sliku o Loparu i našemu Rabu.
Bravo Sandra. I drago mi je da je celi libar posvetila svomu ocu Jolu Jeriću, boj un je to zasvin i više nego zaslužil. Va libru je skupljeno kolo 150 pismic satriskih, ke najviše povidaju o ljubavi zas vojin krajen, ali i onoj drugoj ljubavi med mladićima i divojkamin. U ovom portalskom kantuniću niman namiru sve to prezentat, nego mi pada napamet učint ćakulu i sulac od ljubavi i ljubomore va timan pismicamin. Dabome, va ljubavi se sve i začimlje, ma kadi ima ljubavi ima i ljubomore. Ali evo, najprvo ljubav:
Zima prođe, nastane proliće
Procvat će po granama cviće
Zapivat će tice milopojke
Sastavit će i kolo divojke.
Galofare beli i rumeni
Ja te molim daj pokora meni
I podaj mi tvoga rumenila
Zvat ću se tvoja draga mila.
Murtelice krasno cviće moje
Joj da mi je ubrat sime tvoje
Ja bi znala kome bi ga dala
Dragom mome u dvore poslala.
Ali kako to šempre zna bit, va ljubav se (nažalost) i ljubomora zamiša, pa mladić zna i divojku molat, a ljubav se va jad i kljatve pretvori. Evo, jušto navi mod:
Gojila san jabuku rumenu
Iznenada sada mi provenu
Što najdraža mome srcu bila
Sada san je mlada izgubila.
Sedan noža moje srce para
Kad moj dragi z drugon razgovara!
Suzo moja padaj mi na krilo
Drugi ljubi ča je moje bilo.
Vrag ti vazel zdravlje i veselje
I to su ti moga srca želje!
Na grobu ti svića ne gorila
Da Bog dal te kuga umorila!
Ti si meni na karti pisala
Da Bog da ti oba oka pala
Ti jedina da ćeš moja biti
I da drugog ti nećeš ljubiti!
A znaš li draga ća je onda bilo
Kad san tvoje milovao tilo?!
Evo, zato još jedan put: bravo Sandra! I neka zna da je njezina Murtelica i ovoga puta lipo zadušila.
- Napisal: Joso Fafanđel (23.5.2018.)