Home Beseda po domaću Rapski kantunić Josa Fafanđela: TUMBULI

Rapski kantunić Josa Fafanđela: TUMBULI

0
Rapski kantunić Josa Fafanđela: TUMBULI

Foto: Foto: Hrvoje Keko

 

Na isti mod tumbul se je dogdil i va ribariji. Sada ako ćeš poć namore dva-tri arubunića prevarit, moraš sobon nosit brime robe, boj zvečera se arija grubo na mrzlinju prehićuje. Altroke ono po leti kada činiš dvi koristi – loviš ribu i sunčaš se zausput, tobože, griješ telo i loviš forcu za zimu ka će isto pomalo arivat. A da ne govorin ono kada si leti sam va kaiću pa ti više puti ni budande nisu od potribe.

Rab danas oglas

 

A znate vi ki se je još tubul ovih dan dogodil? Oštija, a potle one prve bure i naši gosti su se latili parićivat za partence. Vreda tira gliseri na kraj i biž ća na prešu kako da će ih po putu i veli snig zametat.

 

Da ne govorin kako se je jedan mali tubmbul i va našemu Saboru dogodil. Istešo, tumbul je već i to ča su ovih dan potle veloga letnjega odmora, tobože, počali laurat. I već va prvoj uri su se vreda i pokarali. 

Ben, ma to i ni niš novoga, zato san i rekal da se je va Saboru mali tumbul dogodil, boj oni drugo niš i ne činu nego se samo karaju i kuntreštivaju. Da mi je samo znat jesu se more bit i mogli prepoznat. Boj, kada su se prije leta rastali bili su beli kako sir, a kada su se ovih dan nazad va Sabor tornali, bili su črni od sunaca jušto kako da su se z blakon namazali.

 

A i oni od SDP-eja su se latili čint svoji tumbuli. Oštija, ako to duron moru čint oni od HDZ-eja, a ča nebi i oni. I tako su se počali malo i medase karat, a oni ča su već i više od dvajset godin va Saboru, oni su se latili i ostavke davat. Oštija, a neka znate da bi i ja potle dvajset godin guljenja lipe plaće va Saboru, da bi diboto i ja dal ostavku. Nabrali su lipi šoldi za svo to vrime i njiman je dosta, pa je unda najbolje navrime i poć ća, a da ne govorin kako će potle i lipa penzijica arivat. A oni ki ostaju neka se i naprvo medase gombaju.

 

Inšoma, kada već spominjen penzije ovih dan slušan i ćakule od pulitičarov, tobože, jesu penzije narasle va zadanje vrime šejst, četiri, tri, oli dva i malo više posto. Sve su to va jednu velu matematiku pretvorili pa čoviku više ni ćaro kuliko mu je zapravo penzijica narasla. Onima maliman, dabome, more bit kolo 50, oli 60 kun, a to more učint jušto za kupit par škatulic plivadona da čovika od svega toga baren malo manje glava boli. Jako in slabo gre matemtika. Jušto kako i onomu mićemu školantu od drugoga razreda, ki je ovih dan bil z dedon na ribi, pa da su un i ded ćapali devet, ma lipih arbunov. Šervala je to njigova teta, pa je skoristila i tu prliku da maloga nauči računat. Pita ona njega: Viš lipi moj, ded je latil sedan, a ti dva arbuna. I kuliko ste unda ti i ded ribe ćapali? A mali da se je latil z ručicon zaglavu, zeru je študijal, pa da govori teti: A latili smo pun cigalj!

Kako je da je, ma meni se isto pari da je od svih tumbulov – mali učinil najboljega.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime