Home Beseda po domaću Rapski kantunić Josa Fafanđela: SOLO SEMPRE PER PIŠARE

Rapski kantunić Josa Fafanđela: SOLO SEMPRE PER PIŠARE

0
Rapski kantunić Josa Fafanđela: SOLO SEMPRE PER PIŠARE

Foto: Piše: Josip Fafanđel (Foto: Boris Kazija)

 

Da, boj z druge bande svi volimo jako kritikat i rugat se oniman na vlasti, a unda molamo da ih drugi bira misto nas. Ben, jedan glas i ni puno, ali jedan po jedan pa se nakupi. Zrno po zrno pogača, kako ona lipa narodna govori. A z druge bande more bit da je to i bolje za onih ki nisu zadovoljni zoniman ki su na izborima zibrani. Boj, ako ne valjaju, unda lipo moru reć: A to van je, vi ste ih zibrali pa neka van i budu. Ja ne, ja nisan ni blizu bil!

Rab danas oglas

 

Sve je to lipo, ali meni se jedna stvar njanci malo ne pijaža. Ne pijaža me ča se za mesto gradonačelnika na Rabu ni prijavila njanci jedna ženska. A jušto san jednaput govoril, a i va momu libru san to zapisal, kako baš na Rabu najveću komandu držu ženske.

Sve je to moguće, ali isto bi bilo najbolje da svi idemo na izbori, svaki redon, ki je zdrav i ki more, pa bi se tekar unda moglo reć, da smo zibrali ono ča smo va većini i otili. A uvako 30% ljudi zibere vlast, a 70% njih ne gre ni blizu. I unda vajk ostaje ono pitanje, tobože, da ča bi se dogodilo da je i onih 70% šlo na glasovanje. Po moju, sve bi unda šlo na drugi mod i to jušto po pravdi. Ali ove godine će i korona pomoć, da ljudi još manje idu na glasovannje. Korona priti, ali izbori gredu naprvo.

 

Inšoma, na kanati smo i to dočekali, da su se i na Rabu dali navidelo kandidati za gradonačelnika, a i za Grasko vijeće, dabome. Kuliko san ja do sada mogal i čut i skupit, najprvo su navistili da će sadašnji gradonačelnik Grgurić nanovo poć va tu trku. Kad potle njega se je javil još jedan Grgurić, ali ovaj se zove Luka i da je od nezavisne liste. Potle se čulo za Kruna Bega, od Domovinskoga pokreta, pa unda se je javil i Eros Grubišić, tobože isto nezavisni. Ni mogal od manjega da se javi i Marko Sandalić, ali ne za gradonačelnika nego za glavnoga od Graskoga vijeća, a isto da je nezavisni. Potle, va zadnju uru, digal je dva prsta i Zdenko Matijević, ki je jedan put već i bil na tomu mestu.

 

Jušto mi je ovih dan jedan povidal sulac kako mu se je prijatelj žalil da doma nima mira, boj da mu žena samo njurga po kući. Ma ne tobože zato boj da je len i da niš ne čini ni po kući ni po vanu, ne, nego da žena njurga zato boj da je sve slabiji va postilji.

Sve je to lipo, ali meni se jedna stvar njanci malo ne pijaža. Ne pijaža me ča se za mesto gradonačelnika na Rabu ni prijavila njanci jedna ženska. A jušto san jednaput govoril, a i va momu libru san to zapisal, kako baš na Rabu najveću komandu držu ženske. Oštija, a do toga se lako more doć kada pobrojimo sve one ke držu škole, apoteke, bolnice, Pučko učilište, knjižnice, oba suda, turističku zajednicu, Udrugu penzijonera i sve tako redon. I manje-više, sve to one dobro i rivaju naprvo. Sve, jedino nećeju da se vlasti lovu. A mogle su lipo načint i svoju žensku stranku pa bi se tekar unda vidilo ki će bit na vlasti i ki gradonačenik, oli gradonačelnica. Dabome, muški se zotin nebi složili, boj govori mi jedan, da ni lipo imit žensku stranku ni va kući, a kamo li još i va općini.

 

Ma ala šu, valja reć da ni lipo i nati mod špotat ženske. Pugotovo ne ove naše na Rabu, boj kako ča san već rekal, one, ako ćemo pravo, najviše i jesu na vlasti. A ča je još važnije dobro in i gre ono ča držu va komandi. E sad, a ča se doma po kućamin dogaja to je već drugi par postolov. Jušto mi je ovih dan jedan povidal sulac kako mu se je prijatelj žalil da doma nima mira, boj da mu žena samo njurga po kući. Ma ne tobože zato boj da je len i da niš ne čini ni po kući ni po vanu, ne, nego da žena njurga zato boj da je sve slabiji va postilji. A njemu da je to dojadilo i ni dvi ni tri nego da je šal kod doktora, pa neka ga un lipo svega vižita i neka mu da potrvrdu – je seksualno zdrav oli ni. I likar ga je vižital pa da mu je za dijagnozu napisal samo četiri slova – SSPP, a unda mu je povidal da mu to znači: Siguro sigurisimo – potente potentisimo. I dočim je un čul ono siguro sigurisimo, trk un doma kod žene, pa je govori: A vidiš ti ženo ovo SSPP? To ti znači: Siguro sigurisimo – potente potentisimo. A žena da mu je zgulila z ruke tu kartu, pa da mu govori: Ma znaš ti ča ću ja tebi reć – ovo SSPP, to ti po moju znači: SOLO SEMPRE PER PIŠARE!

 

Joso Fafanđel za Kantunić, 03.05.2021.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime