Home Beseda po domaću Rapski kantunić Josa Fafanđela: DURANJE OD ŽIVLJENJA

Rapski kantunić Josa Fafanđela: DURANJE OD ŽIVLJENJA

0
Rapski kantunić Josa Fafanđela: DURANJE OD ŽIVLJENJA

Foto: Foto: Miroslav Maroević (iz arhivske zbirke Josipa Andrića)

 

Tobože, korona. A mogli su ga brate i kural nazvat, onaj lipi črljeni starinski kural ča su ga ženske kolo vrata obiševale. Kad ove šetemane dočul san ja da se sada i ona tičja gripa nanovo javlja. Da ne spominjen kako su nas jedno vrime strašili i s prašćon gripon, pa potle da su i krave bile podudile.

Rab danas oglas

 

Ben, ma sulacan se dabome, ali ovaj virus od korone da je puno zločestiji, boj ovoga puta neće da gre na kokoše, krave i prasci nego se je drito za čovika zalipil. Kako da je čeper, a ne virus. A ča je najgore i grube stvari ljudiman čini. Jedni pasaju malo lišije, preskucaju ga kako i gripu, drugi boluju, pa i ozdravu, a treći nažalost i umiru. I eto ti ga unda i veloga straha, boj svaki voli ča više živit.

 

Inšoma, a evo unda prlike za jednu ćakulu ku mi je ovih dan jedan moj prijatelj povidal. Dabome, čovik da bi tribal živit a najmanje 85 godin. Boj, tobože, da je to Bog naredil, ono kada je odavna već slagal kuliko će godin života dat svakoj beštiji, pa i čoviku. Evo, naki mod da se je to dogajalo. Bog da je čoviku odredil da će živit 40 godin, ali lipo i z lahka. A tovaru da je dal 20 godin, boj da će un puno trpit, nosit teret, dobivat nogade i sve tako, pa da ni lipo da dugo va toj patnji žive. A čovik da je nato rekal, da dobro, ali neka i mi ljudi malo težje živemo, samo neka dobijemo još i onih 20 godin od tovara. I učini bog tako, pa se zato i mi više puti patimo kako i tovari. A unda je na red došal pas, ki tobože samo luta i da je za života više gladan nego sit, pa neka jadan žive samo 15 godin. A čovik da se je jopet nagoluzal, pa ala neka i čoviku da još tih 15 godin. Bog da je i to poslušal. I tako je čovik već arival do 75 godin života. E, ali da je došal na red i majmun komu je Bog naminil samo 10 godin, boj da će se šnjin ljudi samo smijat i rugat pa mu više i ne triba. Ali čoviku ne da vrag mira, pa oće un još i tih 10 godin od majmuna. I tako da je Bog i učinil, pa je čoviku skupa naminjeno punih 85 godin života.

 

Lipo dabome, ali ča se sada čoviku kroz život dogaja? Prvih 40 godin da žive vesel, mlad i zdrav, pa unda od 40 do 60 da se muči kako tovar, od 65 do 75 da ga svi počimlju nogadat kako pasa, a od 75 do 85, unako već star, da žive kako majmun, pa se svi šnjin samo rugaju i smiju.

 

Eto, ma i ove bolešćine nas uču da je bolje i sve to provat nego pod črnu zemlju prije vrimena arivat. Kuraju i živili!

 

Joso Fafanđel – za Kantunić, 26.11.2021.

KOMENTIRAJ ČLANAK

Molimo, unesite Vaš komentar!
Molimo, ovdje unesite Vaše ime