Foto: RabDanas
Oćo, a ni to ni za sulacat se priko mere. Dočim bi me ki ta prozval da san ja čarobnjak, unda bi niki drugi rekli uvako: Ju vraže, pa ako je un čarobnjak uda zna i čare petivat! I lipo bi se unda dogodilo, ma vraga lipo nego grubo, da bi se ljudi počali od mene dricivat. A ki vrag voli imit posla zonin ki tobože zna drugiman čare čint? E, jedino bi na ruku mogal doć oniman, ki va čare još vajk viruju, pa bi me svako to malo zvali da in dojden čare i raščinjat. Oštija, mogal bi još i ki šolad zaradit, makar će bit prvije da bi se mogal va kakove kumedije zaplest.
A ča mislite da mi kakova baba doma ariva pa da mi se, recimo, zijada kako se njezina nuka neće da ženi i kako ona zato sumilja da je njoj niki čare petal? E a unda bi ja moral svih potirat ća s kuće van pa se z mladon nukon sam va kamaru zaklopit. A kada se čare raščinjaju unda se i ruke moru na svako mesto rivat. Valja divojku pipat po celomu telu, da bi čovik mogal napipat naki modi su je i kadi i na komu mestu te vražje čare petane. Oštija, a moral bi je i pitat ča je se dogodilo i zač neće da se ženi i eto ti ga na, nebi puno vrimena pasalo da se latimo i o oniman muškiman i ženskiman stvariman govorit. I tako, malo po malo, mene sve lovi strah da bi se ona mogla, ne daj Bože, najednaput i meni kolo vrata obisit. Oćo, a i nati modi se moru čare raščinjat. I unda bi se ja našal na velomu čudu: ča učint, oću čare raščinjat, oli kučit na vrata i zvat upomoć? Ali mogal bi ja kučit i više kada san svih potiral s kuće van!
Bože moj, a evo jušto san se spotil od muke. I sada mi je vela sten od srca pala, kada san došal sebi i kapil kako ja to samo zamišljan, a zapravo ja nisan ni čarobnjak, nit čare znan raščinjat. Oćo, daj ti čare kvragu, bolje je na mlade ženske ča z daljega oko hititat.
Ben ma reć ću van pravu istinu. Čare su mi došle napamet kada san ovih dan pročital onaj popis stanovništva i kada san vidil da nas je manje i va državi i va Rabu i va Loparu. Oštija, a tribalo bi sada vit zač je to tako, pa unda učint i mire da jopet dojdemo na svoje. Ni lipo za čut, ali na Rabu nas je va zadnjih deset godin za celu hiljadu manje, pa još i malo priko toga. Kuliko san mogal šervat prvi je o tomu progovoril naš Krešo Butković, a i dal je svoje mišljenje, dabome. Potle njega javil se je i Marko Sandalić, a un je jopet na svoj mod mudroval. Po njigovu, moglo bi se učint puno toga, ali najviše se nazire ona mira da tribaju mladi više dice čint. Nato se je vreda javila ona vižljasta Ema Šimičić pa je Marku uvako poručila: A ča čekaš, počni čint!
Eto, od svega se more učint malo sulaca, makar je jako žalosno da nas je sve manje na ovomu našemu školju. I Krešo i Marko i Ema imaju pravo, ali i svi drugi bimo se morali ćapat posla da tu bolešćinu ča prvije zabrenzamo. Eto, zato san čare i spomenul, boj ako nan to ne bude hodilo za rukan unda ćemo zazbilja morat zvat onoga ki zna čare raščinjat. Ben, ma najprvo moramo vit je nan ki tuji čare učinil, oli smo ih mi sami sebi petali.
Napisal: Joso Fafanđel – Za Rab Danas, 24.1.2022.
