Foto: Foto: Josip Fafanđel
Ni odavna pasalo da smo od toga nesrićnoga zapada, ili bolje reć od Amerike, dopeljali i ono novo slavlje ko se zove Noć vještica. Da, sada smo i viške va zabavu pretvorili. I dabome, dobro da se je baren crikva na to pobunila, makar ni njiman ni tudi do čuvanja domaćega običaja, nego va tomu vidu poganstvo. A ja ne vidin nikakovo poganstvo, nego jopet tuji običaj ki mi vreda vazimljemo kako naš.
Bila je moja nevča Branka niki dan doli po Dalmacji zonan kumpanijoj od Tunere, pa mi govori da je va Makarskoj bura puhala ala vraga paklenoga i da ozgora od Biokova toči doli jako mrzal zrak. Eto vidiš, govorin ja nato njoj, to ti je isto ono kada mi rečemo da je naš Velebit belu kapu obukal, da je na vrhu zahladilo i da bura nosi doli, pa i priko mora do nas, onaj mrzli zrak od planine. A va Makarskoj mora bit još i gore, boj je ona šoto na kraju, a ne priko mora kako mi. Ben, ma ni straha, bura već zna nać svaki putić za do svakoga mesta arivat. I zato jopet moran reć kako naši stari nisu bili bedasti kad su prasci ubijali jušto va ovomu štajunu. Tomu je pomogal i nidanji praznik (dvajzdeveti), ali ni to bilo glavno, nego je bila glavna mrzlinja va ovo doba od godine. A mrzlinja je jopet bila važna da se meso očuva i da muhe zalebrenjanci i pršuti ne zapljuvaju.
Inšoma, sva je srića da prascov na Rabu više ni, boj na ovomu teplomu vrimenu muhe bi zazbilja svo mesinje zapljuvale. Govori meni nato jedan: Ma ča to govoriš, da na Rabu ni prascov? Ima ih ima samo su se sada va ljudi pretvorili! Nasmijal san se nato, dabome, boj ako čovik malo bolje razmisli lako bi se moglo reć da tudi ima, a baren i jedna zerica istine. Da ne spominjen onu ćakulu od pokojnoga Pera Dedića, tobože, da svako drugi, boj to bi bilo isto malo priko mere. Ali laškajmo to, boj dabome, zasvin su nova vrimena arivala, pa se više va ovomu štajunu ne ubijaju prasci, nego se već va prvima danima od miseca navišćju i slavu božićni i novogodišnji blavdani. Sve se redon sada slavi, i došašća, i sveta Kata i sveti Mikula, pa i sveta Lucija, dan kada valja i šenicu posijat va potići. A to se, kuliko ja pametin, a pametin puno, to se na Rabu ni uvako priko mere slavilo. A da ne rečen da su danas i lipu staru i našu rič došašće, preimenovali, pa sada došašća ni, nego svi navelo pripovidaju o adventu. A to da njanci blavdan ni. Ali to je novo i sve ćemo mi zmislit, zalipit se i vazet kako da je naše, samo da se ča više fraja. Za to smo jako lešti.
Ben, ma budući da je ovo domaća ćakula užanca bi unda tribala bit da se domaćega i držimo. I ćakul i užanc. Eto, zato i je prlika da i o adventu rečemo par besed. Kako ča san već rekal, to se kod nas na Rabu ni uvako navelo slavilo. I ne govorin to zato boj da mi je krivo. Ne, nego se držin onoga ča san već rekal, držin se domaćih užanci, pa mi ove nove gredu napak, oli baren malo na treso. Diboto bi rekal, po onoj znanoj – da je žaba vidila kako se konj potkiva, pa je i ona digla nogu. Ali homo redon.
Ali to je novo i sve ćemo mi zmislit, zalipit se i vazet kako da je naše, samo da se ča više fraja. Za to smo jako lešti.
Triba malo zavirit va libri, a mudri libri nan govoru da je advent latinska beseda, a ne naša. Nit je hrvaška, nit domaća. Kako ča san već spomenul malo prvo, hrvaška beseda za to je – došašće. Kuliko san mogal šervat i svi katolički kalendari govoru o došašću, a ne o adventu. Malo san se znenadil kada san pročital da to zaprvo i nisu blavdani, nego da su to samo pripreme za Kristov dolazak i to do polovice od ovoga miseca, a va drugoj polovici da su to pripreme za Kristov rođendan – za Božić kada je postal čovikon. Ben ma, sve su to crkvene užance i užance vjernikov i dogajale su se po kućamin i va crikvi, a danas su i od toga učinjene fešte i kukanje. Rasvitli se pol Grada, činu se jaslice i sve hita na veselje, žmulj vina, botilju pive i kuhane kobasice. Sve je to lipo za vit, dabome. Lipo je za vit i Rapsku fjeru, ono po leti, ali vrime došašća i po nidanjiman starima običajiman, nikad ni bilo ni fešta ni fjera. Tude bi više moralo bit i vire i duše. A danas se dodar va oviman danima i skližemo po Gradu ča s došašćen nima nikakove veze. Kako da je malo va državi nepravde na koj se svi do jednoga moremo kad-tad poskliznut i past. I to, ma kadi drugo, nego drito na guzicu, da prostite.
E da, tako van je to. Mladi volu zabavu, a oni ki va zabavamin zarađuju oni ćeju i viru va fešte pretvorit. Ni odavna pasalo da smo od toga nesrićnoga zapada, ili bolje reć od Amerike, dopeljali i ono novo slavlje ko se zove Noć vještica. Da, sada smo i viške va zabavu pretvorili. I dabome, dobro da se je baren crikva na to pobunila, makar ni njiman ni tudi do čuvanja domaćega običaja, nego va tomu vidu poganstvo. A ja ne vidin nikakovo poganstvo, nego jopet tuji običaj ki mi vreda vazimljemo kako naš. To oće reć da činimo užance od onoga ča naše užance nikad nisu ni bile. A rekal san lipo već malo prvo – sve ćemo mi učint samo da se slavi. Kad ove godine čujen po televiziji jopet se niki tuji nauk spominje. Ono je Noć vištica, a ovo da je sada Črni petak. Ni mi zasvin ni ćaro ča je va tomu nauku blavdan, zabava, oli užanca. I zato mi se sve više čini da je to samo propaganda da se tira ljudi na kupovanje, da se troši i šoldi guli. Nisan varamente čul onih od crikve da su se i nato pobunili, ali dobro bi bilo da reku i oni ku besedu. Oštija, njih more bit ljudi više i slušaju. Ako niš drugo, ma unda sigurno više nego ovi naši zastupnici va Saboru, a i njihove stranke. Ma njih ne samo da triba ča manje slušat, nego je najbolje začepit uši pa ih nikakor i ne slušat. Ala šu, to se samo tako reče, tobože da uši začepit. Danas je mudernije, recimo badnut va botunić, pa prehitit program na drugu bandu. I na televiziji i na radiju. Lipo badneš, pa neka oni laju kuliko ih je volja.
I sve da je to samo demokracija. Demokracija je, oli baren nika sorta od demokrcije, ali više puti nas baš i ne veseli nego jako brzo dojadi. Kako ča mene jadaju i ta strana imena, ti adventi misto došašća, i ti črni petki. E da, boj da baren reku da je to črni petak. Poslušajte malo na televiziji, ni črni petak nego Black friday! I tako nan se pomalo dogaja da sve kopiramo od nikoga vražjega zapada. A na zapadu ima svega, pa ni ne znaš od koga sve to gre, makar se med redi sve more pročitat. A spomenimo se samo kakovih smo se imenov ćapali. I to ne samo imenov od ljudi, nego i imenov od hoteli, restorani, picerije, ma sve redon. Nima više domaće besede, sve je to samo zapad. Tamo je raj i samo tamo teču i med i mliko. A imena od dice? A bože moj, bolje je i ne spominjat sve te Christianei Stephanie i milijun onih drugih, Kadi su naši Ivani, Osipi, Stipani, Anti, Marije i Ružarije. Sve se to pomalo pod noge hita, boj da je tuje bolje. A z druge bande oćemo bit veli Hrvati. I na to su već ljudi pomalo navikli, ali malo se i rugaju, pa da se je zato na jednomu kršćenju mogla čut i uvakova pismica: Krsti pope dite/ Daj mu ime Stipe/ A kad dojde doma / Zvat ćemo ga Toma..!.
Joso Fafanđel – za Kantunić (6.12.2022..)
