Foto: Foto: Hrvoje Hodak
Oštija, ma pilu imaju i oni gori na vlasti, a i zastupnici svaki svoju. A pilu oni brate i pilu po celi dan i noć, ali nikakor ni čut glasa od pile. Ben, a ča unda more bit nego da su pile napak obrnuli, pa zaman pilu kada ni posla za vit. A i ovi naši na Rabu da imaju i kosori i pile, pa da mi je samo znat jesu oni more bit kosori dobro naoštrili i pile navrime parićali. Pasivan šemprije šoto onih njihovih kancelarij Gradu, ali jok, niš se ne čuje. Ma ala da su i oni pile napak obrnuli?!
A onaj trgovac Koštanto ni pilil nego je vajk činil po svoju. Jednoga dana, potle pijace, došla je kod njega va butigu jedna mlada Mundanika. Otila je kupit kotol i budandice za šoto. I pita ona njega da kuliko to gušta? A Koštanto da je govori:
– “A lipa moja, gaćice su ti po četiri, a kotol po tri dinara.”
A ona ga je vreda napala:
– “A ne šjor Koštanto, to je skupo za mene, pa bi mogli malo cenu kalat.”
A un da je nato govori:
– “A dobro, lipa moja, unda ćemo uvako – dat ću ti unda gaćice po tri, a kotol po četiri dinara.”
Kupila je ona i kotol i gaćice i šla je pomalo doma, ali se je puten, tamo prid nidanju Istru, domislila kako je račun jednako platila, samo je hurbasti Koštanto cenu obrnul. I trk ona vreda nazad va butigu, pa ga unako ljuta napade još od vrat:
– “Šjor Koštanto, vi ste meni jako grubu stvar učinli!”
A nutri su bile i nike starije Kicarke, pa su otvorile oči i medase se pogledale. A Koštanto se tobože čudi pa je pita.
– “A ča to, lipa moja, ča san ti ja učinil?”
– “Da ča!, ljuto će njemu divojka, vi ste meni najprvo digli kotol, a unda ste mi gaćice kalali!!!”
Dabome, na to su se Kicarke latile za glavu, zipljucale su Koštanta i utekle van od butige.
Ma lipa ćakula za kanatu od godine, oli baren želja da se i namin ne dogodi da va ovoj novoj i mi moramo gaćice kalivat, oli ih nedaj Bože, na šćapu nosit. I zato na vrime naoštrimo i kosori i pile za svako dračje kolo sebe liberivat.
I za kanatu od godine, oli začetak ove nove – puno sriće, a zdravlja još i najviše!
Joso Fafanđel – za Kantunić (29.12.2022.)